Nagpadayon ang paghisgot sa giingong iregularidad sa confidential funds atol sa ika-13 nga adlaw sa impeachment trial batok kang Vice President Sara Duterte kagahapong adlawa.
Mitubag sa mga pangutana sa mga senator-judges ang kanhing Commission on Audit-Intelligence and Confidential Funds Audit Office State Auditor nga si Roderick Wamil. Gipasabot niya ang kalainan sa acknowledgment receipt ug official receipt, ug giingong wala sa sakop sa ilang compliance audit ang pag-verify kung tinuod ba ang mga ngalan nga anaa sa mga dokumento.
Human niini, gipresentar sa House prosecution ang ilang ikaupat nga testigo nga si COA Supervising Auditor Xylene May Del Campo. Matud niya, si Vice President Sara Duterte lamang ang nahimong Kalihim sa Department of Education nga nakadawat og confidential funds sukad 2014.
Gimando usab sa Senate Impeachment Court ang prosecution ug defense panels nga magkasabot og petsa gawas sa korte aron hiniusang susihon ang mga acknowledgment receipts ug magkasabutan sa mga common exhibits.
Sa dili pa gitapos ang sesyon, gipahibalo sa House prosecution nga sunod nilang ipresentar isip mga testigo sila Del Campo, House Legislative Information Resources Management Department Director Marivic Pareja, ug kanhing OVP Special Disbursing Officer Gina Acosta.
Gilauman nga mobalik ang pagtaral sa sunod nga Lunes aron ipadayon ang presentasyon sa mga testigo ug ebidensya ubos sa Article I sa impeachment complaint.
