Nagpahimangno ang City Government of Davao nga magpatuman kini og exhumation sa mga nahibilin sa minatay nga nalubong sa mga nitso o ossuary nga paso na ang kontrata.Nasayran nga kapin 152 ka expired contracts ang natala sa Wireless Public Cemetery nga nahimutang sa A. Pichon Street, Barangay 8-A, Davao City.
Sumala sa Ordinance No. 0291-17, Series of 2017, human sa unom ka tuig nga lease period, ang mga nahibilin sa minatay pagahukayon ug ibalhin ngadto sa ossuary ilawom sa bag-ong kontrata. Kinahanglan usab nga mabayran ang P220 nga imposition fee ug ang annual renewal fee matag Enero.
Gipasidan-an usab sa lokal nga panggamhanan nga ang dili pag-renew sa kontrata nga mahimong mosangpot kini sa pagbalhin sa mga nahibilin sa minatay ngadto sa common nga lubnganan. Sa pagkakaron, ang mga mahaw-as nga nahibilin sa minatay temporaryong ibutang sa depository sa sementeryo hangtod makuha sa ilang mga kabanay ug malubong sa lugar nga ilang pilion.
