Gilauman nga mahitabo ang pag-ilis sa liderato sa Kamara de Representantes, sumala sa mga impormasyon nga nagkatag sulod sa Kongreso karong adlawa.
Kusog ang hungihong nga si Deputy Speaker Faustino “Bojie” Dy sa ika-unom nga Distrito sa Isabela ang posibleng mopuli isip House Speaker, diin ilisan si Speaker Ferdinand Martin Romualdez.
Kahinumduman nga sa wala pa kini mahitabo, migawas na usab ang mga pangalan sa ubang mga kongresista isip mga potensyal nga kandidato sa maong posisyon.
Kini ang gilangkuban nila Ronaldo Puno sa Unang Distrito sa Antipolo, Vincent Franco “Duke” Frasco nga gikan sa Ikalimang Distrito sa Cebu, Toby Tiangco nga gikan sa Navotas ug Alfredo “Albee” Benitez nga gikan sa Bacolod.
Bisan og adunay mga pamahayag nga tsismis lamang kini nga mga balita, apan nagkagamay na ang mga pagduda nga usa kini ka konkretong lakang sa pagpuli sa liderato sa Kamara karong adlawa.
Samtang sa bahin ni Cong.Tiangco gibutyag niini nga wala siyay plano nga mahimong Speaker o Chairperson sa Appropriations Committee.
Sumala kang Tiangco,adunay nakighinabi kaniya aron mahimong House Speaker taliwala sa mga hungihong nga pulihan ang liderato sa Kamara apan wala niya kini gidawat.
Pagpasabot sa nahisgutan, usa siya sa mga nagbulabog sa isyu sa korapsyon, hinungdan nga dili maayo kung siya usab ang molingkod sa puwesto.
