DAVAO CITY – Gikanayon ni Davao City Disaster and Risk Reduction Management Office (CDRRMO) training officer Lyndon Ancajas nga kung mapanday na ang gidusong ordinansa kalabot sa mga residente nga nanimuyo duol sa fault line sa dakbayan sa Davao, hayan nga ibalhin na ang mga nahisgutan ug ideklara ang nahisgutan nga mga lugar isip “No Build Zone”.
Sa kasamtangan, gihulat na lamang nila ang assessment report gikan sa “Walk The Fault” activity sa milabay nga Hunyo diin kauban nila ang Philippine Institute of Volcanology and Seismology (PHIVOLCS) sa pagdetermina sa mga lokasyon sa fault.
Kahinumduman nga una ng gibutyag sa Phivolcs nga adunay kinatibuk-ang 60 ka mga barangay sa siyudad ang nahimutang sa Central Davao Fault System nga gilangkuban sa lima ka segments. Kalakip niini ang Tamugan Fault nga adunay 25 kilometers (kms) length ug mamahimong makamugna ug 6.7-magnitude earthquake; Lacson Fault nga adunay 33 kms ug delikado sa 6.8-magnitude quake; 18-kilometer Dacudao Fault nga delikado sa 6.5-magnitude quake; Pangyan-Biao nga adunay 33 kms ug delikado sa 6.8-magnitude quake; ug 12-kilometer New Carmen Fault nga mamahimong tinubdan sa 6.3-magnitude earthquake.
Samtang wala sumala pay nadawat nga impormasyon ang ahensiya gikan sa nahisgutan nga mga barangay kung nagsugod na ang pagbalhin sa mga residente human ang gipahigayon nga “Walk The Fault” sa Phivolcs.
Hinuon padayon sumala pa ang CDRRMO sa pagpahigayon ug information campaign ngadto sa mga residente nga nanimuyo sa maong dapit.
