Gimando ni Bureau of Customs Commissioner Ariel Nepomuceno ang komprehensibong inventory ug accounting sa tanang baril nga giisyu ngadto sa mga kawani sa ahensya.
Gihimo ang mando human sa pagpamusil sa usa ka eskwelahan sa Zamboanga City diin usa sa mga armas nga nalambigit giingong gikan sa usa ka Customs Police personnel.
Matod pa ni Nepomuceno, susihon usab sa BOC ang pagsunod sa tanang polisiya bahin sa gun safety, firearm custody, pagbiyahe ug hustong pagtipig sa mga armas.
Dugang pa, gihatagan ang tanang concerned personnel og 24 oras aron motuman sa maong direktiba ug isumiter ang gikinahanglang impormasyon kabahin sa mga armas nga ilang gihuptan.
Lakip sa tumong sa inventory ang pagsuta kung kompleto, husto ug luwas ang pagdumala sa mga government-issued firearms.
Sa pagkakaron, gipasalig sa BOC ang transparent nga pagpatuman sa review aron malikayan nga mausab ang susamang insidente ug mapalig-on ang accountability sa sulod sa ahensya.
