Gidayig sa mga netizens sa Davao City ang usa ka 10-anyos nga bata human siya nakuhanan og hulagway nga mitabang sa pagrescue sa biktima sa vehicular accident nga nahitabo sa Quimpo Boulevard niadtong Abril 30.
Sumala pa sa report, giila ang bata nga si Christ Nathan Fabracuer, nga gitawag sa mga netizens nga “Batang 911,” anak sa usa ka trainer sa City Disaster Risk Reduction and Management Office (CDRRMO) , nga maoy nagtudlo kaniya sa husto nga paagi sa pagresponde sa emerhensiya.
Lakip sa nahibal-an, aksidente lamang nga nahitabo ang insidente samtang paggawas sa bata sa usa ka establisemento human siya mipalit og ice cream, apan tungod sa iyang kahibalo sa first aid, dali dayon siyang niresponde sa biktima.Dugang pa niini, ang bata nakahuman na og standard first aid ug basic life support training tungod sa iyang kanunay nga partisipasyon sa mga training ug seminar sa CDRRMO sulod sa pila ka tuig.
Sa kasamtangan, daghang netizens ang nagpahayag og pagdayig ug paghangop sa iyang gipakita nga kahanas, bisan pa sa iyang batan-ong edad, nga ilang giingon nga talagsaon ug inspirasyon sa uban.Sa pagkakaron, giila siya isip simbolo sa kabatan-onan nga adunay disiplina ug kahibalo sa pagluwas og kinabuhi, ug nag-awhag sa publiko nga magtuon usab og basic life-saving skills aron andam sa panahon sa emerhensiya.
