Gilauman nga makahatag og klaro ang bank ug tax records nila ni Vice President Sara Duterte ug sa iyang bana nga si Manases Carpio kalabot sa isyu sa giingong pagdako sa ilang bahandi.
Kini ang gipahayag ni House Prosecution Spokesperson ug Kabataan Party-list Representative Renee Co.
Kini human isumite sa mga bangko ug sa Bureau of Internal Revenue (BIR) ngadto sa Senate impeachment court ang mga dokumento nga gipangayo pinaagi sa subpoena.
Lakip usab sa mga gipangayo nga ebidensya ang report sa Anti-Money Laundering Council (AMLC) kabahin sa mga transaksyon sa magtiayon.
Matod ni Co, importante nga susihon ang maong mga rekord aron itandi kini sa Statements of Assets, Liabilities and Net Worth (SALNs) ug income tax returns (ITRs) sa Bise Presidente.
Una nang nagreport ang AMLC nga adunay P6.7 bilyong “covered” ug “suspicious” transactions nga gi-flag sa mga bangko, samtang gipakita sa SALNs nga misaka ang net worth ni Duterte gikan sa P7.5 milyon niadtong 2007 ngadto sa kapin P88 milyon sa 2024.
Gipasiugda usab sa prosecution nga adunay gahum ang impeachment court sa pagsusi sa bank ug tax records isip kabahin sa pagdungog sa impeachment case.
