Mokabat na sa kapin P111.9 milyon na ang kantidad sa ayuda nga na-apod-apod sa Department of Social Welfare and Development o DSWD XI ngadto sa mga apektado sa magnitude 7.8 nga linog sa Mindanao, kini matud sa pinakaulahing datos sa nga gipagula sa ahensya.
Matud ni DSWD XI Spokesperson Atty. Hazel Cirunay, mikabat na sa P111,987,557 ang kinatibuk-ang kantidad sa tabang nga ilang nahatag, lakip na ang mga food packs, ready-to-eat food packs, ug cash assistance alang sa mga apektadong pamilya. Sa kasamtangan, aduna nay 32 ka evacuation centers nga gipahimutang alang sa mga biktima sa linog, diin ang Jose Abad Santos maoy usa sa labing grabeng naapektuhang lugar.
Sumala sa DSWD XI, 2,491 ka indibidwal ang kasamtangang nagpabilin sa maong mga evacuation centers. Gipatin-aw usab sa ahensya nga abli ang mga evacuation centers alang sa tanan nga nanginahanglan og temporaryong kapuy-an. Wala usab silay gitakdang panahon kung kanus-a sirad-an ang mga kampo.
Samtang, magpabilin nga operasyon ang mga evacuation centers hangtod nga ang mga local government units o LGUs na ang mopuli sa pagdumala sa mga kampo, ug hangtod nga ma-stabilize ang sitwasyon ug luwas na alang sa mga residente ang pagbalik sa ilang mga panimalay.
