Misaka na sa kapin 4 milyong indibidwal, nga mokabat na sa kapin 1.2 milyong pamilya, ang naapektuhan sa hiniusang epekto sa mga bagyong Luis ug Maymay ug sa habagat.
Sumala sa pinakabag-ong datos gikan sa Office of the Civil Defense (OCD), naapektuhan ang mga rehiyon sa Ilocos, Cagayan Valley, Central Luzon, Bicol, Western Visayas, Zamboanga Peninsula, Calabarzon, Cordillera Administrative Region, Metro Manila ug Mimaropa.
Sa mga apektadong pamilya, kapin 51,000 ka indibidwal ang temporaryong nagpuyo sa mga evacuation center.
Base sa datos sa OCD, 21 na ka tawo ang namatay tungod sa mga kalamidad.
Pinakadaghan ang namatay sa Benguet nga miabot sa 15 ka tawo, samtang adunay mga casualty sa La Trinidad, Baguio ug Atok, nga kadaghanan namatay tungod sa landslide.
Tig-tulo usab ang namatay sa Rizal ug Batangas tungod sa pagkalumos, pagkakuryente ug pagdahili sa yuta.
Padayon ang pagpangita sa tulo ka gikatahong nawala gikan sa Alaminos City sa Pangasinan, Batangas City ug Candelaria sa Quezon.
Misaka na sa kapin P2.6 bilyon ang kantidad sa kadaot sa sektor sa imprastruktura, samtang kapin P347 milyon na ang kadaot sa agrikultura.
Padayon usab ang paghatod og tabang sa gobyerno ngadto sa mga naapektuhan sa kalamidad, nga miabot na sa kapin P495 milyon.
| via Bombo Ray Ann Martinez
