Misulod na sa quarterfinals sa Mubadala DC Open ang Filipina tennis sensation nga si Alex Eala human mapildi ang defending champion nga si Leylah Fernandez sa Canada sa iskor nga 6-2, 7-6 (7-1). Human dominahon ang unang set, nakabangon si Eala gikan sa 1-5 deficit sa ikaduhang set ug padayaong gipildi si Fernandez sulod sa usa ka oras ug 53 minutos.
Sumala pa kang Eala, dili sayon ang maong duwa tungod sa kusog nga performance ni Fernandez, apan iyang gipasidunggan ang iyang kaugalingon tungod sa pagpabiling kalmado ug determinado hangtod sa katapusan sa duwa. Dugang pa niini, gipasabot ni Eala nga ang pagpailob ug padayon nga pagpangitag paagi aron makabawi bisan pa sa pagkalayo sa iskor maoy usa sa nakatabang kaniya aron maselyohan ang kadaugan.
Kahinumduman nga sa unang hugna sa torneyo, napildi usab ni Eala ang Paris Olympic gold medalist nga si Zheng Qinwen sa China pinaagi sa tulo ka set nga duwa. Sa quarterfinals, atubangon ni Eala ang modaog sa panagsangka tali ni second seed Elina Svitolina sa Ukraine ug qualifier nga si Polina Kudermetova sa Russia. Sa pagkakaron, nagpadayon ang impresibong kampanya ni Eala sa torneyo, nga nagpadayag sa iyang lig-on nga tinguha nga makalawom pa sa kompetisyon.
