Nagsugod ang Armed Forces of the Philippines (AFP) sa pagpangandam alang sa pagtukod sa kaugalingong military space center nga mahimong mahimong usa ka hingpit nga space command o space force sa umaabot.
Gipadayag ni AFP Chief General Romeo Brawner Jr. nga giaprubahan na ni Pangulong Ferdinand Marcos Jr. ang pondo alang sa proyekto nga ipatuman uban sa Philippine Space Agency.
Tumong sa programa ang pagpalig-on sa kapasidad sa militar sa pagpaniid, komunikasyon, ug paggamit sa modernong teknolohiya sama sa drones ug ubang defense systems.
Gipahibalo ni Brawner nga target sa AFP nga makabaton sa unang defense satellites sa nasud pag-abot sa 2028.
Gipasabot sa AFP chief nga kinahanglan una nga matukod ang space center aron mapalambo ang mga eksperto ug organisasyon nga gikinahanglan sa dili pa mahimong operasyonal ang mga satellite.
Dugang pa niya nga kung matuman ang proyekto, magsilbi kining “mata sa kawanangan” aron makatabang sa pagbantay sa mga kalihokan sa yuta ug kadagatan, ingon man sa pagpaayo sa komunikasyon sa militar.
Makigtambayayong ang AFP sa Philippine Space Agency nga karon nagdumala sa mga programa sa kawanangan sa Pilipinas.
Giplano usab sa AFP nga sa unang hugna mogamit og mga low-Earth orbit satellites nga mahimong kabahin sa mas halapad nga space infrastructure sa Pilipinas.
