Nadakpan na sa mga otoridad sa Mexico ang 44-anyos nga si Fausto Isidro “Chapo Isidro” Meza Flores, nga nalakip sa Top 10 Most Wanted list sa Federal Bureau of Investigation o FBI sa Estados Unidos.
Gipangulohan sa Mexican special forces ang operasyon sa Guasave, Sinaloa diin nasikop si Meza Flores uban sa usa sa iyang mga kauban.
Sumala sa report, misukol pa ang grupo sa suspek ug nagbayloay og pinusilay batok sa mga otoridad sa wala pa kini hingpit nga nadakpan.
Gidala dayon sila sa Mexico City human sa operasyon.
Giingong lider si Meza Flores sa Meza Flores Organization, nga nailhan usab nga Guasave Cartel ug aktibo na sa illegal drug trade sukad pa sa dekada 1990.
Giatubang niya ang mga kaso nga may kalabotan sa organized crime ug pagpayuhot sa fentanyl, cocaine, heroin ug uban pang ilegal nga droga.
Nalakip usab siya sa FBI most wanted list niadtong 2025 tungod sa mga kasong kidnapping, extortion ug torture.
Gituohang nakatabang ang intelligence information gikan sa Estados Unidos aron masubay ang iyang tagoanan.
Nalambigit usab siya sa 20 milyones ka fentanyl pills nga nasakmit sa mga otoridad niadtong 2024.
Una na siyang gipasakaan og drug trafficking cases sa Estados Unidos niadtong 2012 ug 2019.











