Gihan-ay na sa Air Niugini ang pagbalik sa Port Moresby sa mga pasaherong naapektuhan sa precautionary diversion sa ilang flight gikan Hong Kong nga mitugpa sa Davao International Airport.
Matud ni Air Niugini Chief Executive Officer Alan Milne, ilang gisusi ang mga kapilian aron mauli ang mga pasahero sa labing madali nga panahon human mapugos ang eroplano sa pag-divert tungod sa problema sa usa sa mga makina niini.
Gidayeg usab ni Milne ang mga piloto sa ilang pagdumala sa sitwasyon ug pagpasalig sa mga pasahero ug tripulante atol sa maong insidente.
Sa pagkakaron, gipailalom na sa hingpit nga teknikal nga inspeksyon ang eroplano aron matino ang hinungdan sa problema.
Gipasalig sa kompanya nga magpagawas sila og dugang impormasyon sa publiko human makompleto sa mga engineer ang ilang pagsusi. Gipasiugda usab ni Milne nga kaluwasan sa mga pasahero ug tripulante ang ilang unang prayoridad.











