Naghain og petisyon ang kampo sa depensa ni kanhi Presidente Rodrigo Duterte ngadto sa International Criminal Court o ICC aron isalikway ang testimonya ug ebidensiya sa giilang witness P-0002, nga usa sa kanunayng gigamit nga tinubdan sa prosekusyon sa kaso batok kaniya.
Sa petisyon nga gisumite niadtong Nobyembre 18, giingon sa depensa nga napakyas ang prosekusyon sa pagpamatuod nga kwalipikado ang maong saksi nga motestigo ug mahimong dawaton ang iyang mga pahayag isip ebidensiya.
Gikuwestiyon usab sa kampo ni Duterte ang kredibilidad sa saksi tungod sa giingong pag-usab-usab sa iyang mga pahayag ug pagsalig lamang sa impormasyon nga gihatag kaniya sa ubang indibidwal niadtong miaging tuig, nga wala kunoy klarong dokumentong mosuporta niini.
Matud sa depensa, dili patas sa mga akusado kon dawaton ang maong testimonya isip ebidensiya.
Atubangon ni Duterte ang mga akusasyon nga may kalabotan sa mga pagpatay atol sa iyang kampanya batok sa ilegal nga droga.
Gikatakdang ipahigayon sa Nobyembre 30 ang hearing diin gilauman nga unang tawagon sa prosekusyon ang lima ka saksi. Magsugod usab ang winter break sa korte sa Disyembre 18.











