-- ADVERTISEMENT --

Gipatin-aw sa kampo ni Senador Ronald “Bato” Dela Rosa nga wala niya biya-i o gibiyaan ang iyang opisina bisan dugay na siyang wala makatambong sa personal nga mga sesyon sa Senado.

Sumala sa iyang abogado nga si Atty. Israelito Torreon, nagpabiling bukas ang opisina sa senador ug adunay mga kawani nga nagpadayon sa pagserbisyo.

Gipasabot ni Torreon nga wala lamang motambong si Dela Rosa sa mga sesyon tungod sa iyang gikahadlokang pagdakop ug pagdala ngadto sa International Criminal Court o ICC.

Kahinumdoman nga nag-atubang ang senador og ethics complaint tungod sa dugay niyang pagkawala sa mga kalihokan sa Senado. Niadtong Nobyembre 19, nadawat sa iyang opisina ang reklamo.

Matud ni Torreon, nakasumite na sila og tubag ug naghulat kon adunay dugang nga mga affidavit nga ipasa, tungod kay lima pa lamang sa siyam ka reklamo ang adunay kaubang affidavit.

-- ADVERTISEMENT --

Gipahayag usab sa abogado nga mosumite si Dela Rosa sa iyang tubag sulod sa gitakdang panahon ug gilauman nilang magbase ang komite sa mga lagda ug ebidensiya sa pagdesisyon sa maong reklamo.