-- ADVERTISEMENT --

Gituohan sa House prosecution panel nga pamaagi lamang sa paglihis sa atensiyon gikan sa impeachment trial batok kang Vice President Sara Duterte ang pahayag sa kampo sa Bise Presidente kalabot sa giingong gihisgotang no-election scenario sa 2028 sulod sa House of Representatives.

Tungod niini, gihagit ni House impeachment prosecutor ug Manila Representative Joel Chua ang tigpamaba ni Duterte nga si Atty. Paolo Panelo Jr. nga pamatud-an ang iyang mga alegasyon imbis nga magpagawas og mga isyu nga walay kalabotan sa impeachment proceedings. Gipunting ni Chua nga mas maayong tubagon na lamang sa kampo sa depensa ang mga alegasyon batok sa Bise Presidente.

Matud pa ni Chua, kinahanglan nang undangon ang paghisgot sa nagkadaiyang isyu nga mahimong makapalayo sa atensiyon sa publiko gikan sa mga pangutana nga giatubang sa impeachment trial. Misalmot usab sa maong panglantaw si House prosecution spokesperson ug Lanao del Sur Representative Zia Alonto Adiong, kinsa nagkuwestiyon sa panahon sa pagpagawas sa maong alegasyon, ilabina samtang naglisod kuno ang depensa sa pagbatok sa mga pinansyal nga ebidensiya batok kang Duterte.

Gipahimangnoan ni Adiong ang kampo sa Bise Presidente nga likayan ang pagpalapad sa mga alegasyon nga walay lig-on nga basihan ug magpabilin sa mga isyung may kalabotan sa impeachment trial. Matud pa ni Adiong, adunay paningkamot nga ibalhin ang atensiyon sa publiko gikan sa impeachment proceedings, ilabina kay wala pa kuno makapresentar ang depensa og testigo nga makapamatuod nga dili tinuod ang mga ebidensiyang gipresentar sa prosekusyon.

Sa pagkakaron, giatubang ni Duterte ang nahibiling impeachment charge ubos sa Article II, nga may kalabotan sa alegasyon nga adunay mokabat sa P817.87 milyones nga unexplained wealth ug gidili nga pag-apil sa negosyo gikan sa 2022 hangtod 2025. Padayon usab nga gilimod sa kampo sa Bise Presidente ang maong mga alegasyon.

-- ADVERTISEMENT --