Gihagit ni House prosecutor panel member ug Manila 3rd District Representative Joel Chua ang kampo ni Bise Presidente Sara Duterte nga tutokan sa ilang depensa ang pagtubag sa alegasyon bahin sa gatosan ka milyong pisong bahandi nga wala kuno nade klarar, imbes nga magpakita lamang og mga dokumento nga nagpamatuod sa rehistro sa ilang negosyo.
Nahisgotan kini sa wala pa ipadayon ang impeachment trial sa Senado ugma, Nobyembre 19, diin gikatakdang ipresentar sa depensa ang upat ka testigo sulod sa duha ka adlaw nga pagdungog.
Matod ni Chua, wala man gikuwestiyon sa prosekusyon ang pagparehistro sa Cale88 Foods Corporation sa Department of Trade and Industry (DTI), ingon man ang pagparehistro sa produkto nitong banana chips sa Food and Drug Administration (FDA).
Gikanayon sa magbabalaod nga dili kini ang pangunang isyu sa impeachment trial tungod kay kinahanglan gihapong tubagon sa depensa ang mga alegasyon bahin sa gatosan ka milyong pisong bahandi nga wala kuno nade klarar sa bise presidente ug sa iyang bana nga si Manases Carpio.
Gihisgotan usab ni Chua ang testimonya sa ilang eksperto nga testigo nga si Atty. Alex Cabrera, nga kuno naglatid sa kapin P800 milyong wala nade klarar nga kinitaan nga giugnay sa bise presidente.
Gibutyag sa kongresista nga dili angay maliso ang pagdungog gikan sa pangunang alegasyon nga kinahanglan tubagon sa kampo ni Duterte.
Ipadayon pag-usab ugma ang impeachment trial sa Senado aron ipresentar sa depensa sa bise presidente ang ilang mga testigo nga motubag ug mosupak sa alegasyon ubos sa Article II sa impeachment complaint, nga may kalabotan sa unexplained wealth o bahandi nga wala kuno maipasabot ang gigikanan.











