-- ADVERTISEMENT --

Naigo ang usa ka barkong nagkarga og liquefied petroleum gas (LPG) sa Black Sea niadtong Martes, sumala sa mga awtoridad sa Bulgaria ug sa kompanyang nagdumala sa barko.

Usa kini sa sunod-sunod nga insidente nga gituohang adunay kalabotan sa nagpadayong gubat tali sa Russia ug Ukraine.

Sumala sa pahayag sa Bulgarian Defense Ministry, naluwas ang tanang 19 ka tripulante sa barkong Gas Husky.

Matod sa kompanyang Stealth Maritime nga nakabase sa Greece, naigo ang barko sa kaadlawon samtang naglawig sa Black Sea, sulod sa exclusive economic zone sa Bulgaria.

Apan wala espesipikong gisulti sa kompanya kon unsa ang nakaigo sa barko.

-- ADVERTISEMENT --

Sumala sa ministeryo, naglayag ang barko ubos sa bandila sa Liberia ug nagkarga og 3,400 ka toneladang liquefied petroleum gas (LPG) gikan sa Egypt padulong sa Romania. Sakay niini ang 19 ka Pilipinong tripulante.

Gikataho nga mokabat na sa 14 ka komersiyal nga barko ang naigo sa mga drone sa Black Sea, duol sa Romania ug Bulgaria, sukad pa sa unang bahin sa Oktubre.

Kapin sa 30 ka marinero ang namatay o gikatahong nawala tungod sa maong mga insidente.

Samtang, giluwas usab sa Bulgarian Transport Ministry ang 12 ka tripulante sa barkong Betul 8, nga nagkarga og daghang trigo gikan sa Romania padulong sa Egypt.