-- ADVERTISEMENT --

Gipapanubag sa Department of Energy (DOE) ang 114 ka gasolinahan human mapakyas sa pagpatuman sa gimando nga pagpaubos sa presyo sa mga produktong petrolyo.

Sumala ni Oil Industry Management Bureau (OIMB) Director Rino Abad, nakahimo ang DOE og inspeksyon sa 213 ka gasolinahan sa nagkadaiyang lugar sa nasud gikan Nobyembre 10 hangtod 13.

Base sa resulta sa inspeksyon, 114 niini ang napakyas sa hingpit nga pagpatuman sa gimando nga price rollback, ilabina sa pagpaubos sa presyo sa gasolina nga mikabat sa ₱16.80 matag litro.

Gihatagan og 72 ka oras ang mga apektadong gasolinahan aron magpasa sa ilang mga pagpatin-aw, apan wala makumbinse sa DOE ang ilang mga rason.

Lakip sa mga gipakamatarungan sa pipila ka gasolinahan mao ang ilang pagpalit sa mga suplay sa lana pipila ka semana sa wala pa ipatuman ang rollback, diin mas taas pa ang presyo niini.

-- ADVERTISEMENT --

Samtang, gipasa na sa DOE Legal Department ang mga taho sa inspeksyon aron susihon ang posibleng paglapas sa mga gasolinahan.

Kung mapamatud-ang nakalapas sa balaod, mahimong mag-atubang ang mga tag-iya niini og pagka priso gikan sa tulo ka bulan hangtod usa ka tuig, ug multa nga mokabat sa ₱50,000 hangtod ₱300,000.

Mahimo usab nga magpahamtang ang DOE og administratibong silot, lakip ang multa ug pagsuspenso o pagbawi sa ilang mga lisensya sa negosyo.

Dugang pa, giawhag sa DOE ang mga konsumidor nga ireport ang mga gasolinahan nga dili motuman sa gimando nga pag-usab sa presyo pinaagi sa eGovPH application o sa 8888 hotline.