Wala madismaya ang Pilipinas bisan napakyas nga makompleto karong tuiga ang dugay nang gipaningkamutang kasabutan nga Code of Conduct (COC) sa South China Sea tali sa Association of Southeast Asian Nations (ASEAN) ug China.
Bisan wala nakab-ot ang tumong nga mapinal ang maong kasabutan atol sa pagpangulo sa Pilipinas sa ASEAN karong 2026, nagpabilin ang pagsalig sa kagamhanan nga mahuman gihapon ang negosasyon.
Sumala kang Department of Foreign Affairs (DFA) Secretary Theresa Lazaro, dako na ang nauswag sa mga panaghisgot tungod kay 80 porsiyento na sa mga probisyon sa burador sa kasabutan ang giuyonan sa mga partido.
Dugang pa niya, nagkinahanglan lamang og dugang panahon aron masulbad ang mga nahibiling isyu ug makab-ot ang makahuluganon ug pinal nga kasabutan. Gipasabot usab ni Lazaro nga dili angay isipon nga kapakyasan ang wala pagkakompleto sa COC atol sa pagpangulo sa Pilipinas, tungod kay natuman na sa nasud ang bahin niini sa pagpadayon sa negosasyon.
Sa kasamtangan, ipadayon ang mga panaghisgot ubos sa pagpangulo sa Singapore, nga mao ang sunod nga mangulo sa ASEAN, aron masulbad ang nahibiling mga isyu ug makab-ot ang pinal nga kasabutan tali sa ASEAN ug China.











