Nakit-an ang bag-ong lava dome sa summit crater sa Bulkang Mayon, hinungdan nga gipabilin sa Philippine Institute of Volcanology and Seismology (PHIVOLCS) ang Alert Level 3 tungod sa nagkadakong posibilidad sa peligroso nga pagbuto niini.
Gipasidan-an sa PHIVOLCS nga nagpasabot ang Alert Level 3 nga ang magma anaa na o hapit nang mosaka sa baba sa bulkan, nga posibleng magresulta sa pag-awas sa lava, pyroclastic density currents (PDCs), pagkahulog sa mga bato ug pag-ulan og abo.
Tungod niini, hugot nga gipatuman ang mandatory evacuation sulod sa unom ka kilometros nga Permanent Danger Zone (PDZ), samtang gipahimangnoan usab ang mga residente sa pito ka kilometros nga Extended Danger Zone (EDZ) sa pipila ka sektor nga mag-amping.
Sa wala pa namatikdan ang lava dome pinaagi sa close-up camera monitor sa Mayon Volcano Observatory, una nang nadiskobrehan sa usa ka international partner agency ang paghubag o bulging sa crater floor pinaagi sa satellite images niadtong Nobyembre 2 hangtod 4, 2026.
Gipasabot nga timailhan ang pagpakita sa lava dome nga misaka na ang magma gikan sa sulod sa bulkan, nga mahimong mosangpot sa effusive o explosive nga pagbuto. Padayon nga gibantayan sa PHIVOLCS ang kalihokan sa Bulkang Mayon pinaagi sa nagkalain-laing monitoring instruments aron makahatag og tukmang pahimangno sa mga lokal nga panggamhanan ug komunidad.
Kahinumduman nga ang Bulkang Mayon, nga ilado tungod sa hapit hingpit nga pormang kono, usa sa labing aktibong bulkan sa Pilipinas ug adunay kasaysayan sa kanunayng pagbuto, lakip na ang pag-awas sa lava ug makadaot nga pyroclastic flows.
