Pormal nang giablihan karong Nobyembre 13, 2026 ang ASEAN 2026 International Media Center, nga gipangulohan nila Presidential Communications Office (PCO) Secretary Lino Cayetano ug Tourism Secretary Dita Angara-Mathay.
Magsilbi ang maong pasilidad nga lugar sa pagtrabaho sa mga lokal ug langyaw nga mamamahayag nga motaho sa mga kalihokan kalabot sa ASEAN 2026.
Sa mensahe, gipatin-aw ni PCO Sec. Cayetano nga gitukod ang media center aron mahatagan ang mga mamamahayag og hapsay ug komportableng lugar diin mahimo nilang matuman ang ilang mga katungdanan.
Kabahin usab sa tumong niini ang pagpaila sa mga langyaw nga bisita sa kultura, mga produkto, industriya ug katawhang Pilipino.
Giawhag ni Tourism Secretary Angara-Mathay ang mga Pilipino nga makig-uban sa mga langyaw nga mamamahayag, ipaambit ang mga hagit nga giatubang sa nasod ug palig-onon ang kooperasyon tali sa mga miyembro sa ASEAN ug ubang mga kanasoran.
Mipasalig usab ang PCO ug ubang ahensya sa gobyerno nga andam silang motabang aron masuportahan ang mga mamamahayag sa ilang pagreport sa maong kalihokan.
Sa laing bahin, nagpahigayon usab og press briefing si Department of Foreign Affairs (DFA) Deputy Director General ug ASEAN Spokesperson Dominic Xavier Imperial.
Gikatakdang ipahigayon ang 49th ASEAN Summit and Related Summits gikan Nobyembre 15 hangtod 17, 2026, diin ang Pilipinas ang host country.
