Gipanghimakak sa Kamara de Representantes ang mga alegasyong mikabat sa P1 trilyon ang kantidad sa mga amyendang gihimo niini sa gisugyot nga 2027 national budget, ug gipasiugda nga P115 bilyon lamang ang aktuwal nga kantidad sa mga pagbag-o.
Matod ni Camarines Sur Representative Arnie Fuentebella, lakip sa mga amyenda ang pagtul-id sa mga detalye sa mga proyekto ug dili lamang ang pagbalhin sa pondo gikan sa usa ka ahensya ngadto sa laing ahensya.
Gipasabot usab ni Bataan Representative Albert Garcia nga kadaghanan sa mga pagbag-o naggikan mismo sa mga ahensya sa gobyerno ug sa mga proyekto nga wala naapil sa orihinal nga gisugyot nga badyet.
Giawhag sa mga magbabalaod ang publiko nga susihon una ang matag amyenda sa dili pa mohimo og konklusyon kalabot sa pagkalehitimo niini.
Giklaro usab ni Surigao del Sur 1st District Representative Romeo Momo Sr. sa Nacionalista Party nga dili pasabot nga ang kinatibuk-ang kantidad sa mga amyenda mao usab ang kantidad sa pondo nga gikuha gikan sa usa ka ahensya ug gibalhin ngadto sa laing ahensya.
Anaa na karon sa Senado alang sa pagsusi ang gisugyot nga P7.2 trilyong pambansang badyet sa dili pa ang bicameral conference deliberations.
