Gitawag ni Defense Secretary Gilberto Teodoro nga “manhid” ang China sa mga diplomatikong pahayag sa Pilipinas, human gikuwestiyon pag-usab sa Beijing ang soberanya sa nasud ibabaw sa Batanes.
Gihangyo ni Teodoro ang mga Pilipino nga dili motuo sa bakak nga balita ug disinformation, ug suportahan ang mga sundalong nagdepensa sa nasud.
Matud niya, adunay lig-on nga legal ug historikal nga basihan ang Pilipinas sa pagpanalipod sa Batanes, lakip na ang arbitral award.
Nagsugod ang kontrobersiya human adunay mga Chinese scholar nga miangkon nga natural extension sa Taiwan ang Batanes ug angay kining mapasailalom sa China.
Apan gisalikway kini sa National Historical Commission of the Philippines, nga mipatin-aw nga pormal nang naapil ang Batanes sa administrasyong kolonyal sa Espanya niadtong 1783 ug walay ebidensiya nga gimandoan kini sa China.
Pasiugda usab ni Teodoro ang panginahanglan nga palig-onon ang depensa sa nasud, lakip ang pagtukod og estratehikong mga military base sa mga baybayon nga nag-atubang sa Pacific Ocean.
Samtang, gisiguro usab niya nga dili makababag sa operasyon sa Department of National Defense ug Armed Forces of the Philippines ang maong isyu sa diplomasya.
