Ibutang sa Senado isip pangunang prayoridad ang paghisgot sa gisugyot nga ₱7.2 trilyong nasudnong badyet alang sa 2027 sa pagbalik sa sesyon karong Lunes, human sa usa ka bulan nga pahulay.
Mipasalig ang mga senador sa mas hugot nga pagsusi sa mga alokasyon ug mas transparent nga proseso sa pag-apruba sa badyet.
Subay sa kalendaryo, sugdan sa Nobyembre 23 hangtod Disyembre 1 ning tuiga ang interpellation, samtang gikatakda ang pag-apruba sa ikaduhang pagbasa sa Disyembre 3 ug ikatulong pagbasa sa Disyembre 7. Ang bicameral conference committee meeting ipahigayon sa Disyembre 10 hangtod 12, una sa ratipikasyon sa Disyembre 22.
Giduso ni Senator Panfilo “Ping” Lacson ang live streaming ug paghimo og transcript sa bicameral proceedings aron masubay kung kinsang mga magbabalaod ang nagsugyot og mga kausaban ug nagbalhin-balhin sa pondo.
Samtang, mipasalig si Senate President Sherwin Gatchalian nga tangtangon ang ₱8.836 bilyong kantidad sa mga proyektong pang-imprastraktura nga kulang sa teknikal nga dokumento gikan sa Department of Public Works and Highways. Sa 11,395 ka proyekto nga gisusi, 7,107 o kapin sa 62 porsiyento ang adunay dagkong iregularidad.
Gikuwestiyon usab sa mga grupo sa civil society ang kapin ₱1 trilyong alokasyon sa badyet nga giaprubahan sa Kamara tungod sa posibilidad sa politikal nga pabor-pabor. Gipahimangnoan sa Malacañang nga i-veto ni President Ferdinand Marcos Jr. ang mga kausaban nga walay tukmang dokumentasyon ug lehitimong katuyoan.
Sa Kamara, gipadali ni Speaker Faustino “Bojie” Dy III ang paghisgot sa mga prayoridad nga lakang, lakip ang pagpakunhod sa buhis sa mga mamumuo, pagtangtang sa system loss charges sa bayranan sa kuryente,ug pagreporma sa partylist system.
Lakip sa gisugyot nga tax measure ang pagpataas sa income tax exemption threshold ngadto sa ₱350,000 gikan sa ₱250,000 aron madugangan ang madawat nga sweldo sa mga mamumuo nga ubos ug tunga-tungang kita.
Samtang, tumong sa reporma sa partylist system nga masiguro nga tinuod nga marepresentahan ang mga sektor nga ilang ginaangkon nga gibarogan, sumala ni Tingog Representative Jude Acidre.
