Posibleng mosulod sa Philippine Area of Responsibility o PAR ang Severe Tropical Storm Cempaka karong gabii sa Domingo o sa kaadlawon sa Lunes, Nobyembre 9, sumala sa PAGASA.
Apan, wala gilauman nga direktang makaapekto sa nasud ang maong bagyo. Tatawgon kini og “Samuel” sa higayon nga makasulod na sa PAR.
Sa kataposang monitoring sa PAGASA, nahimutang ang Cempaka sa 1,865 kilometros sa sidlakan sa pinakahilagang bahin sa Luzon, nga adunay kusog nga hangin nga moabot sa 110 kilometros matag oras ug pagbugso nga moabot sa 135 kilometros matag oras.
Samtang, magdala ang amihan og madag-um nga kalangitan ug pag-ulan sa pipila ka bahin sa Northern Luzon.
Gilauman usab nga magdala ang easterlies og pag-ulan, kilat ug pagpanalugdog sa Bicol Region, Eastern Visayas, Quezon ug pipila ka bahin sa Mindanao.
Posible usab ang panalagsang pag-ulan ug thunderstorms sa Metro Manila ug uban pang bahin sa nasud.
