Gipadali ni Senate President Sherwin Gatchalian ang pagpasa sa panukalang balaod nga magdili sa mga paryente sa mga opisyal sa gobyerno sa pagkuha og mga kontrata gikan sa pamahalaan.
Gipasiugda niya ang kamahinungdanon sa Senate Bill No. 1962 o Government Contracting and Procurement Integrity Act aron masiguro nga magamit ang kuwarta sa katawhan alang sa mga programa nga makabenepisyo sa publiko.
Gipunting sa senador nga dili angay nga mahatagan og prayoridad ang mga paryente sa mga anaa sa poder sa mga oportunidad nga gipondohan sa publiko.
Ubos sa maong panukala, dili tugotan ang mga paryente sa mga sakop nga opisyal hangtod sa ika-upat nga ang-ang sa pagkadugo o relasyon pinaagi sa kaminyoon sa pagkuha og mga kontrata sa gobyerno.
Lakip sa mga sakop niini ang ginikanan, anak, igsoon, apohan, apo, uyoan, iyaan, pag-umangkon ug unang ig-agaw, lakip ang katumbas nilang mga paryente pinaagi sa kaminyoon.
Naglakip usab ang balaodnon sa nagkalainlaing transaksyon sa gobyerno sama sa pagpalit og mga kagamitan ug serbisyo, mga proyekto sa imprastraktura ug uban pang kasabotan nga gipondohan sa estado.
Pinaagi niini, tumong nga mapugngan ang pag-abuso sa posisyon ug impluwensiya aron makakuha og dili patas nga bentaha sa mga kontrata sa gobyerno.
Giuyonan sa Senado sa ikatulo ug kataposang pagbasa ang Senate Bill No. 1962 niadtong Septiyembre 2, 2026, nga nakakuha og 15 ka boto pabor ug walay supak.
Apan, wala pa kini mahimong balaod tungod kay kinahanglan pa nga makompleto ang nahibiling mga lakang sa proseso sa pagsabatas sa dili pa kini ipatuman.
