Nanawagan ang Malacañang og mas lawom nga imbestigasyon kung nganong gitugotan si kanhi House Speaker Martin Romualdez nga adunay personal nga aide nga motabang kaniya sulod sa Quezon City Jail 24 oras kada adlaw.
Matod ni Palace Press Officer Claire Castro, kung mapamatud-an nga gihatagan si Romualdez og maong espesyal nga pagtagad, mahimo kining isipon nga sobra nga pribilehiyo.
Gipadayag ni New Quezon City Jail Superintendent Maria Lourdes Pacion ngadto sa Sandiganbayan Third Division nga adunay aide nga nag-atiman kang Romualdez 24/7 tungod sa humanitarian grounds, gumikan kay dili pa lig-on nang mental nga kahimtang niini.
Pagpasabot ni Castro nga kinahanglan masuta ang rason sa maong kahikayan, ilabi na kay wala sila’y igong kasayoran bahin sa kahimtang sa panglawas sa kanhing House Speaker.
Samtang, gidayeg sa undersecretacy ang kolumnistang si Ramon Tulfo human giangkon niini nga nakapakaylap siya og sayop nga impormasyon kabahin sa giingong miikyas ni Romualdez gikan sa prisohan.
Una nang gikanayon ni Tulfo nga gipalong kuno ang kuryente aron mapalong ang CCTV cameras ug makagawas si Romualdez. Apan, sa ulahi, miangkon siya nga sayop ang impormasyon nga iyang nadawat ug wala kini pamatuod.
Gihulagway ni Tulfo nga makauulaw ang maong kasinatian isip peryodista, ilabi na kay misalig kaniya ang iyang mga magbabasa.
Gilauman ni Castro nga mahimong panig-ingnan ang pag-angkon ni Tulfo sa iyang sayop ngadto sa ubang nagpakaylap og dili tukmang impormasyon.
