Gipangayo sa prosekusyon sa International Criminal Court (ICC) ang espesyal nga proteksiyon alang sa 55 ka testigo nga motestigo sa kasong crimes against humanity batok kang kanhi Presidente Rodrigo Duterte.
Gibutyag kini sa 12-panid nga hangyo ni Acting Prosecutor Mame Mandiaye Niang nga gipahibalo sa publiko kaniadtong Nobyembre 5, 2026.
Matod ni Niang, adunay makataronganong risgo sa kaluwasan sa mga testigo, diin kadaghanan kanila nagpuyo sa Pilipinas.
Lakip sa posibleng hisgotan sa ilang testimonya si Senador Ronald “Bato” Dela Rosa, hinungdan nga gikinahanglan usab ang ilang proteksiyon.
Gipunting ni Niang nga isip kanhi hepe sa PNP ug kasamtangang senador, aduna gihapoy impluwensiya ug suporta si Dela Rosa sa Pilipinas nga, sumala sa prosekusyon, mahimong makapalisod sa pagpatuman sa arrest warrant batok kaniya.
Lakip sa gipangayong mga lakang ang pagtago sa identidad sa mga testigo pinaagi sa paggamit og alyas ug pag-usab sa ilang dagway ug tingog, pagpahigayon og pribadong hearing, ug paghatag og sikolohikal nga suporta atol sa ilang testimonya.
Ang 55 ka testigo kabahin sa 78 ka testigo nga ipresenta sa prosekusyon sa kaso ni Duterte nga magsugod sa Nobyembre 30.
Base sa opisyal nga datos sa gobyerno, labing menos 6,000 ang nangamatay sa kampanya batok sa ilegal nga droga, samtang gibanabana sa mga human rights watchdog ug ICC prosecutors nga miabot sa 12,000 hangtod 30,000 ang ihap gikan 2016 hangtod 2019.
Si Dela Rosa ang hepe sa PNP gikan 2016 hangtod 2018 ug maoy nagpatuman sa kampanya batok sa ilegal nga droga sa administrasyong Duterte.
Samtang, sumala kang Interior Secretary Jonvic Remulla, posibleng moresulta sa 10,000 ka kamatayon ang pagdakop kang Dela Rosa, hinungdan nga nakigsabot ang gobyerno alang sa iyang pagsurender.
Adunay ₱50 milyones nga ganti alang sa makahatag og impormasyon bahin sa nahimutangan sa senador.
