Gituboy ni Pangulong Ferdinand Marcos Jr. si Supreme Court Associate Justice Rodil V. Zalameda isip sunod nga Punong Mahistrado sa Korte Suprema.
Gipahibalo ni Presidential Communications Office Secretary Lino Cayetano ang maong pagtudlo karong Huwebes, diin mopuli si Zalameda kang Chief Justice Alexander Gesmundo nga moabot na sa mandatory retirement sa Nobyembre 6.
Sumala pa kang Cayetano, kapin sa tulo ka dekada ang kasinatian ni Zalameda sa pagserbisyo sulod sa sistema sa hustisya, sugod sa iyang pag-alagad isip opisyal sa korte ug piskal sa gobyerno, hangtod sa iyang pagserbisyo sa Court of Appeals ug Korte Suprema.
Dugang pa niini, gipasiugda sa Presidential Communications Office nga giila sa Presidente ang kamahinungdanon sa usa ka lider nga adunay igong kasinatian ug lig-on nga baruganan aron mapadayon ang pagsalig sa publiko sa hudikatura.
Gipahayag usab ni Marcos ang iyang pagsalig nga tumanon ni Zalameda ang bag-ong responsibilidad uban ang integridad, patas nga paghusay ug lig-on nga pagpanalipod sa pagmando sa balaod.
Samtang, nagpaabot usab ang Malacañang og pahalipay kang Zalameda sa iyang bag-ong tahas, lakip na ang pagpasalamat kang Gesmundo tungod sa iyang dedikado nga pagserbisyo sa nasud.
Sa pagkakaron, gipaabot ang pormal nga paglingkod ni Zalameda isip sunod nga Punong Mahistrado human sa pagretiro ni Gesmundo sa Nobyembre 6.
