Nakaabot na sa 377 hangtod 379 ang average Air Quality Index (AQI) sa Delhi, India, nga nagtimaan sa grabeng pagkunhod sa kalidad sa hangin ug nagbutang sa panglawas sa milyon-milyong residente sa peligro.
Base sa datos, miabot sa 277 micrograms kada cubic meter ang konsentrasyon sa fine particulate matter o PM2.5, nga kapin sa 18 ka pilo sa 24-hour safe limit nga girekomendar sa World Health Organization (WHO).
Kapin sa 22 ka monitoring station sa siyudad ang nakarekord usab og AQI nga milapas sa 400, nga nahisakop na sa kategoryang “Severe” o grabeng polusyon.
Tungod niini, gipatuman sa mga otoridad ang Stage II sa Graded Response Action Plan (GRAP), nga naglakip sa mas kanunay nga pagpanglimpyo sa mga kalsada, paglimita sa paggamit sa pipila ka sakyanan ug mga lakang aron mamenosan ang aso ug abog.
Lakip sa mga restriksyon ang pagdili sa pagbiyahe sa mga sakyanang dili mosunod sa BS-VI emission standards gikan Nobyembre 1, 2026 hangtod Enero 31, 2027, ingon man ang paggamit sa coal, sugnod nga kahoy ug pipila ka klase sa diesel generator.
Samtang, gipataas usab sa gobyerno ang bayranan sa parking aron dasigon ang paggamit sa mass transport. Nagdugang usab ang Delhi Metro og 20 ka biyahe atol sa weekdays, ug giusab ang oras sa trabaho sa pipila ka opisina sa gobyerno aron mamenosan ang trapiko.
Nahitabo ang pagsamot sa polusyon pipila lamang ka adlaw sa wala pa ang Diwali Festival nga gikatakdang sa Nobyembre 8, diin gilauman usab ang paggamit sa mga pabuto nga mahimong makadugang sa aso sa palibot.
Gawas sa mga pabuto, nakatampo usab sa polusyon ang aso gikan sa mga sakyanan, pagsunog sa mga salin sa pananom sa kasikbit nga mga lugar, ug mga pabrika.
Dugang nga nagpag-grabe sa kahimtang ang hinay nga paghuros sa hangin ug ubos nga temperatura sa amihanang India, nga nakapugong sa pagkatag sa mga hugaw nga emisyon ug nagpabilin niini duol sa yuta.
Lahi kini sa miaging Oktubre, nga nahimong pinakalimpyo nga Oktubre sa Delhi sulod sa walo ka tuig tungod sa kusog nga pag-ulan, base sa mga taho.
