Mipasalig ang Department of Agriculture (DA) nga adunay gigahing pondo sa 2026 national budget alang sa mga programa nga motubag sa posibleng epekto sa El Niño, lakip ang ₱61.99 bilyong plano aron mapanalipdan ang produksyon sa pagkaon ug panginabuhian sa mga mag-uuma ug mananagat.
Atol sa pagdungog sa House Committee on Agriculture and Food, gikumpirma ni DA Assistant Secretary U-Nichols Manalo nga mahimong gamiton ang pondo gikan sa 2026 General Appropriations Act alang sa maong mga programa.
Lakip sa mga pondo ang ₱6.2 bilyon nga unang gipagawas ubos sa UPLIFT program, samtang ang kinadak-ang bahin sa plano nga mokabat sa ₱35 bilyon igahin alang sa mga liso, abono ug uban pang panginahanglanon sa pagpananom.
Apil usab sa mga lakang ang rehabilitasyon sa mga pasilidad sa irigasyon, pag-instalar og solar-powered irrigation, pagtukod og gagmayng water impounding facilities ug pagpahigayon og cloud seeding aron matabangan ang mga lugar nga kulang sa suplay sa tubig.
Naglatag usab og tabang alang sa mga kahayopan, manokan ug palaisdaan, lakip ang crop insurance ug mga pautang aron mamenosan ang posibleng pagkalugi sa mga mag-uuma ug mangingisda.
Kabahin sa UPLIFT program ang gibana-banang ₱3 bilyon nga ayuda sa gasolina alang sa mga mag-uuma, mananagat ug truckers.
Samtang nangayo pa ang DA og dugang nga ₱371 milyon alang sa cloud seeding ug pagkontrol sa mga peste nga makadaot sa mga plantasyon sa tubo.
Aduna usab silay gisugyot nga ₱10 bilyong pondo alang sa ayuda sa mga mag-uuma ug mangingisda sa 2027.
Dugang niini, palig-onon sa ahensya ang pagbantay sa presyo sa mga produkto, transportasyon ug Kadiwa program aron mapadayon ang barato ug abot-kayang presyo sa mga pagkaon.
