Gipasiugda ni House Lead Prosecutor ug Batangas Representative Gerville Luistro nga dili bakak ang mga numero nga makita sa bank account ug tax records ni Vice President Sara Duterte nga gipresentar sa Senate impeachment court.
Gipahayag kini ni Luistro human gipangutana kabahin sa resulta sa survey sa Social Weather Stations niadtong Septyembre, diin daghang Pilipino ang wala motuo sa mga alegasyon batok sa Bise Presidente.
Sumala pa sa kongresista, gikan mismo kang Duterte ang mga dokumentong gigamit sa prosecution panel isip ebidensya ubos sa Article II sa impeachment complaint, nga naghisgot kabahin sa wala mapatin-aw nga kadato o unexplained wealth.
Lakip sa mga gipresentar nga ebidensya ang mga rekord sa buhis ug bangko, ingon man ang mga kompanyang nalambigit sa Bise Presidente ug sa iyang bana nga si Atty. Manases Carpio.
Base sa forensic analysis ni Atty. Alex Cabrera, mokabat sa kapin ₱817.8 milyon ang kantidad sa mga kabtangan nga wala kuno maideklara sa magtiayon sa Statement of Assets, Liabilities and Net Worth o SALN sa Bise Presidente, pinasikad sa konserbatibong pagbanabana.
Bisan pa sa resulta sa maong survey, nagpahayag si Luistro og pagsalig sa kabug-at sa mga ebidensyang ilang gipresentar sa impeachment court.
Dugang pa, lakip sa mga alegasyon ubos sa Article II ang giingong dili hingpit ug matinud-anong pagdeklarar sa mga kabtangan, ingon man ang pagbaton og negosyo ug pinansyal nga interes samtang nagserbisyo isip Bise Presidente.
Sa kasamtangan, nagpabiling bahin sa impeachment proceedings ang pagdawat ug pagtimbang-timbang sa mga ebidensyang gipresentar sa prosecution panel ug sa depensa.
