Namakwit ang gatusan ka residente sa Oleshky sa habagatang Ukraine niadtong Biyernes, Oktubre 30, ubos sa temporaryong kasabotan sa ceasefire nga gipataliwala ni US First Lady Melania Trump.
Kapin sa duha ka libo ka tawo, lakip ang 50 ka bata, ang naipit sa maong lungsod nga kontrolado sa Russia sukad Abril 2022 tungod sa nagkagrabeng gubat ug kakulang sa pagkaon, tubig, kuryente ug tambal.
Nahimong posible ang pagbakwit human magsugod ang temporaryong paghunong sa pagpangatake niadtong Martes ug mahawan ang mga agianan nga kaniadto napalibotan sa mga mina ug kanunay nga pag-atake sa drone.
Gibana-bana nga 750 ka pasahero ang kapasidad sa 25 ka bus nga gigamit sa operasyon. Sumala kang Ukrainian Ombudsman Dmytro Lubinets, agi sa Crimea ug Anapa sa Russia ang mga evacuee, dayon molupad paingon sa Belarus ug mosakay og bus padulong sa teritoryong kontrolado sa Ukraine.
Personal nga miadto si Lubinets sa Oleshky aron ubanan ang mga residente, kauban ang iyang katugbang nga opisyal sa Russia nga si Yana Lantratova. Naghatag usab og humanitarian assistance ang mga opisyal sa duha ka nasod sa mga nagpabilin sa lungsod.
Gipasalig ni Melania Trump nga direktang nakig-istorya siya sa mga lider sa Russia ug Ukraine aron makab-ot ang kasabotan. Mitawag usab si Pope Leo XIV sa duha ka nasod nga hunongon na ang pagpabuto aron mapahigayon ang pagbakwit ug paghatod og tabang.
Gilauman nga matapos sa Domingo, Nobyembre 1, 2026 ang temporaryong ceasefire. Nabalaka ang Ukraine nga posibleng magamit kini sa mga tropang Ruso aron makapabalik og suplay sa ilang mga posisyon.
Wala pa ipahibalo ang eksaktong gidaghanon sa mga gibakwit, samtang adunay mga residente nga mipili nga magpabilin tungod sa ilang kahimtang ug kawalay kahigayonan nga madala ang ilang mga hayop.
