Gilimod sa kampo ni Vice President Sara Duterte ang alegasyon sa usa ka lalaki nga giila sa alyas nga “Chris” nga kaduha siyang naghatod og mga maleta nga adunay sulod nga kwarta ngadto sa bise presidente.
Sa pahayag ni Duterte spokesperson Atty. Salvador Paolo Panelo Jr., gihulagway niini si Chris isip usa na usab ka giingong “tanim witness.” Matud niya, andam si Duterte nga tubagon ang mga alegasyon pinaagi sa ebidensya sa hustong panahon.
Mitungha si Chris sa National Bureau of Investigation (NBI) kaniadtong HuwebesPktubre 29, 2026 ug miangkon nga kanhi siyang drayber ni kanhi House Speaker Lord Allan Velasco. Matod niya, gisugo kuno siya ni Velasco nga magdala og mga maleta ngadto sa Davao City sa duha ka higayon tali sa 2021 ug 2022.
Giasoy niya nga 15 ka maleta ang iyang gidala sa unang biyahe kaniadtong Hunyo 16, 2021, ug susamang gidaghanon sa ikaduhang biyahe niadtong 2022. Apan wala siya masayod sa kantidad sa sulod niini ug wala usab niya makita si Duterte nga midawat sa mga maleta. Ikaduhang tawo na si Chris nga nagpagawas sa maong alegasyon, paghuman ni relieved patrolaman nga si Rodulfo Gracioso Jr.
Sa laing bahin, gipasiugda ni Batangas Representative Gerville Luistro nga ang mga dokumentong gigamit sa House prosecution sa Article II o unexplained wealth case gikan mismo sa kampo ni Duterte.
Misunod kini sa resulta sa Social Weather Stations (SWS) survey diin 25% lamang sa respondents ang kombinsido nga tinuod ang alegasyon sa unexplained wealth ni Duterte. Samtang, 30% ang kontento sa prosecution ug 35% ang dili kontento, nga nagresulta sa net satisfaction rating nga -5.
Gipunting ni Luistro nga ang mga rekord nga gigamit sa forensic study ni Atty. Alexander Cabrera gisumite mismo sa bise presidente.
Pasiugda usab ni prosecution counsel Benjamin Tolosa Jr. nga 78% sa respondents sa survey nga gihimo kaniadtong Septiyembre 21 hangtod 27 ang miingon nga importante nga personal nga motestigo si Duterte sa Senate Impeachment Court aron matubag ang mga alegasyon batok kaniya.
Hangtod karon, wala pa motestigo si Duterte sa impeachment court. Ang iyang pagbisita sa Senado kaniadtong Hulyo 7 alang lamang sa pakigkita sa iyang legal team.
Matud ni Tolosa, wala pa maapil sa survey ang pipila ka dokumentong gipresentar sa prosecution, lakip ang SALN ni Duterte, report sa Anti-Money Laundering Council (AMLC), ug mga rekord sa Bureau of Internal Revenue (BIR).
Lakip niini ang forensic financial report ni Cabrera nga gipresentar kaniadtong Oktubre 9. Sumala sa report, gibanabana nga adunay labing menos ₱817.8 milyon nga bahandi si Duterte nga wala maideklara sa iyang SALN gikan 2022 hangtod 2025. Alegasyon kini sa prosecution nga gilalisan sa kampo sa bise presidente.
Samtang, gikuwestiyon ni Sen. Robinhood Padilla ug Sen. Christopher “Bong” Go ang gidaghanon sa boto nga gikinahanglan aron makombikto si Duterte sa impeachment trial.
Gimandoan sa Korte Suprema ang House of Representatives ug Senado nga motubag sa ilang petisyon nga nagkuwestiyon sa pagtugot sa Senate Impeachment Court nga ubos sa 16 ka boto ang mahimong basihan sa pagkondenar.
Ubos sa Article XI, Section 3(5) sa 1987 Constitution, gikinahanglan ang pag-uyon sa 2\3 sa tanang miyembro sa Senado aron ma-convict ang usa ka opisyal. Apan sumala sa tulo ka kanhing punong mahistrado nga giimbitar isip amici curiae, mahimong ibase ang ihap sa boto sa mga senador nga aktuwal nga miapil sa impeachment court.
Miingon ang mga abogado sa prosecution nga wala pa kunoy direktang kadaot nga kinahanglan sulbaron pinaagi sa petisyon, ilabi na kay mahimong mausab ang komposisyon sa impeachment court sa panahon sa pagdesisyon sa kaso.
