Giakusahan ni Israeli Prime Minister Benjamin Netanyahu ang mga Arab party nga nakabenepisyo kuno sa pagpanglimbong sa eleksiyon sa Israel kaniadtong Martes,Oktubre 27, 2026 apan wala siya magpresentar og ebidensiya nga mosuporta sa maong alegasyon.
Gipanghimakak kini sa mga lider sa Arab party ug gibasol si Netanyahu sa pagdasig sa pagdumot batok sa mga Arabong lumulupyo sa nasud.
Sumala sa mga opisyal sa eleksiyon, gisusi na nila ang mga alegasyon sa pagpanglimbong, apan wala pay timailhan nga sistematikong nakompromiso ang integridad sa eleksiyon.
Sa dihang hapit na maihap ang 93 porsiyento sa mga boto, nanguna sa ihap sa mga lingkoranan sa parlamento ang bloc ni Netanyahu nga adunay 53, gisundan sa kampo sa iyang nag-unang ka-atbang nga si Gadi Eisenkot nga nakakuha og 48 ka lingkoranan.
Apan, kulang gihapon ang duha ka kampo sa 61 ka lingkoranan nga gikinahanglan aron makab-ot ang mayorya sa parlamento.
Gilauman nga makakuha og rekord nga 19 ka lingkoranan ang mga partidong nagrepresentar sa Arab minority, hinungdan nga mahimong importante ang ilang suporta sa pagporma sa sunod nga gobyerno.
Bisan pa niini, wala pa gikonsiderar ni Eisenkot ang pagporma og gobyerno nga mosalig sa suporta sa mga Arab party.
Sumala sa mga lider niini, tumong sa mga pahayag ni Netanyahu nga madaot ang ilang kredibilidad ug mapugngan ang bisan unsang kooperasyon tali kanila ug sa iyang mga kaatbang.
Gisalikway usab sa Central Election Committee ang mga pahayag nga sistematikong nadaot ang integridad sa eleksiyon.
