Andam si Sen. JV Ejercito nga imbitahon ang mga grupo nga nagbantay sa nasudnong badyet sa mga pagdungog sa bicameral conference committee o bicam.
Sa bicam, hisgotan ug ipahiuyon sa mga senador ug kongresista ang ilang tagsa-tagsa ka bersyon sa gisugyot nga nasudnong badyet alang sa 2027 sa dili pa kini hingpit nga mapasar.
Lakip sa mga grupong nagpahayag sa ilang tinguha nga masusi ang paggamit sa pondo sa gobyerno ang People’s Budget Coalition, nga nagpahibalo sa ilang mga nakitang problema sa gisugyot nga badyet atol sa usa ka publikong konsultasyon niadtong Lunes.
Matod sa koalisyon, mokabat sa kapin sa ₱1 trilyon nga mga alokasyon sa badyet ang angay nga susihon pag-ayo.
Lakip niini ang pondo alang sa mga proyektong pang-imprastraktura, mga programa sa ayuda ug unprogrammed appropriations.
Giinsistir sa grupo nga kinahanglan bukas sa publiko ang mga dokumento ug detalye sa mga proyekto aron masusi kung asa padulong ang kuwarta sa mga magbubuhis.
Samtang, nanawagan usab si Sen. Panfilo “Ping” Lacson nga hatagan og higayon ang mga organisasyon sa civil society nga makasubay sa mga pagdungog sa bicam.
Alang kang Lacson, makatabang ang maong mga grupo sa pagsusi sa gisugyot nga badyet, ilabi na kay daghan kaayo ang mga probisyon ug proyekto nga kinahanglan susihon pag-ayo sa dili pa magkauyon ang duha ka kapulungan sa Kongreso.
Gawas sa mga proyektong pang-imprastraktura ug ayuda, lakip usab sa mga isyung gipasiugda sa mga advocacy group ang pondo alang sa Philippine Health Insurance Corporation o PhilHealth.
Gusto sa mga health advocate nga dugangan ang subsidiya sa ahensya aron masuportahan ang mga benepisyo sa mga miyembro ug mamenosan ang ilang gasto sa pagpatambal.
Ang gisugyot nga nasudnong badyet alang sa 2027 mokabat sa ₱7.2 trilyon.
