Nangita og mga lakang ang Department of Energy aron mapamenos ug malangan ang posibleng pagsaka sa presyo sa kuryente tungod sa padayong pagkahuyang sa piso batok sa US dollar.
Sumala ni Energy Secretary Sharon Garin, mopataas sa gasto sa pag-import sa coal, diesel ug liquefied natural gas ang mahinay nga bili sa piso, nga mahimong moresulta sa mas mahal nga bayranan sa kuryente matag kilowatt-hour.
Matud ni Garin, makigpulong siya kang Energy Regulatory Commission Chair ug CEO Francis Saturnino Juan aron hisgotan ang mga posibleng lakang sa pagpakunhod sa epekto sa pagkunhod sa bili sa piso.
Kaniadtong Martes,Oktubre 27, 2026 milapas sa ₱64 kada dolyar ang exchange rate sa piso, bisan pa sa pagpataas sa Bangko Sentral ng Pilipinas sa interest rate aron mapugngan ang inflation.
Samtang, gikonsiderar usab sa DOE ang paghangyo sa mga lokal nga kompanya sa lana nga bahin-bahinon ang pagpatuman sa pagsaka sa presyo sa petrolyo aron dili kaayo bug-at ang epekto sa mga konsumidor.
Dugang kabalaka ang Super El Niño, nga mahimong mopataas sa panginahanglan sa kuryente ug magpahinabo sa posibleng pagsaka sa power rates ug mga brownout.
Sumala sa Philippine Atmospheric, Geophysical and Astronomical Services Administration o PAGASA, gilauman nga moabot sa kinatas-ang epekto ang El Niño sa kataposang bahin sa tuig, samtang nagpasidaan ang Department of Science and Technology nga posibleng makasinati ang nasod og hulaw sa Marso 2027.
