Miabot na sa labing menos 48 ka tawo ang namatay sa pag-atake sa mga armadong lalaki sa baryo sa Binnari, sa estado sa Taraba, amihanan-sidlakang Nigeria, kaniadtong Biyernes,Oktubre 23, 2026, sumala sa pulisya.
Sa inisyal nga report, 10 lamang ang gikatahong namatay human mosulong ang wala mailhing mga armadong lalaki nga nagsakay sa motorsiklo, nangawat sa mga tindahan ug nagsunog sa mga balay.
Sumala ni police spokesperson Victor Mshelizah, nadiskobrehan ang dugang nga mga lawas kagahapong adlawa Oktubre 25. Ang pipila sa mga biktima nalumos samtang misulay sa pag-ikyas, samtang ang uban gipatay sa kalapokan ug kakahoyan duol sa baryo.
Apan ang Amnesty International miingon nga nakumpirma nila nga aduna nay 52 ka namatay, base sa impormasyon gikan sa mga tinubdan sa lugar ug mga residente.
Nahitabo ang pag-atake human sa pag-ampo sa mga Muslim sa udto ug milungtad og hangtod upat ka oras. Sumala sa usa ka lider sa komunidad nga si Malam Abubakar Saifullahi, mga 50 ka motorsiklo nga adunay tagduha ka tawo ang gigamit sa mga suspetsado sa ilang pag-abot. Gawas sa pagpangawat og kuwarta ug pagkaon, gidala usab nila ang mga motorsiklo nga gibiyaan sa mga residente nga nangikyas.
Nanawagan si Amnesty International Nigeria Director Isa Sanusi og patas ug walay-pinalabi nga imbestigasyon, ug gikritikar ang mga otoridad tungod sa giingong kakulang sa proteksiyon sa mga komunidad sa kabaryohan.
Sulod sa daghang tuig, nag-atubang ang pipila ka bahin sa amihanan-sidlakang Nigeria og kapintasan gikan sa mga grupong jihadist ug armadong gang nga mosulong sa mga komunidad, mangidnap ug mangayo og lukat.
Ang insidente nahitabo samtang nangandam ang Nigeria sa eleksiyon sa sunod tuig, diin gilaumang mahimong dakong isyu ang seguridad.
