Gimandoan sa National Capital Region Police Office (NCRPO) ang tanang police units sa Metro Manila nga palig-onon ang kampanya sa pagpahibalo kabahin sa bomb threats ug ang koordinasyon sa mga eskwelahan aron mapanalipdan ang mga estudyante, magtutudlo ug personnel.
Misunod kini sa bomb threat nga nadawat sa University of Santo Tomas (UST) kaniadtong Oktubre 23, diin nakit-an ang managlahi nga mga sulat sa mga kasilyas sa ikaupat ug ikaduhang andana sa St. Martin de Porres Building, nga nahimutangan sa Faculty of Medicine and Surgery.
Lakip sa gihulga sa mga sulat ang Main Building ug St. Raymund de Peñafort Building. Isip pag-amping, gipabakwit ang mga tawo gikan sa tulo ka building, samtang gibalhin sa UST ang mga klase ug trabaho ngadto sa remote arrangements pagkasunod adlaw.
Sumala ni NCRPO Officer-in-Charge Brig. Gen. Christopher Abrahano, kinahanglan nga paspas, hapsay, ug koordinado ang pagtubag sa matag bomb threat. Gimandoan usab niya ang kapulisan nga palig-onon ang pakigtambayayong sa mga school administrator, security personnel, lokal nga pagamhanan, ug emergency responders.
Lakip sa ipasiugda sa kampanya ang hustong pagreport sa hulga, koordinasyon sa kapulisan, organisadong pagbakwit kung gikinahanglan, pagsiguro sa apektadong lugar ug security assessment sa dili pa ipadayon ang normal nga kalihokan sa eskwelahan.
Gipahimangnoan usab ang mga opisyal sa eskwelahan nga tipigan ang posibleng ebidensiya ug likayan ang pagpakaylap sa wala pa mapamatud-ang impormasyon aron dili mosamot ang kahadlok sa publiko.
Kahinumdoman nga nakadawat usab og bomb threats ang University of the East sa Manila kaniadtong Oktubre 20, Far Eastern University niadtong Septiyembre 23, ug National University sa Pasay City mga 20 ka adlaw sa wala pa ang insidente sa FEU. Ang maong mga hulga misangpot sa pagsuspinde sa klase ug pag evacuate sa mga estudyante, apan walay bomba nga nakit-an sa campus sa UE human sa pagpangita sa kapulisan.
