-- ADVERTISEMENT --
- Nagalaom si Senador Panfilo “Ping” Lacson nga malinawon ug walay madugong insidente ang posibleng pag-aresto kang Senador Ronald “Bato” dela Rosa, samtang gipasiugda ang katungod niini sa due process o hustong proseso sa balaod bisan pa sa bug-at nga mga alegasyon nga giatubang niini.
- Sa usa ka pahayag, miingon si Lacson nga nag-ampo usab siya nga mahitabo sa malinawon nga paagi ang pag-aresto kang Dela Rosa, kinsa kaniadto niya nahimong sakop sa Philippine National Police o PNP ug kapwa niya gradwado sa Philippine Military Academy o PMA.
- Gibutyag sa senador nga dili mawala ang katungod sa due process sa usa ka tawo bisan pa og nag-atubang kini og seryosong mga alegasyon.
- Namatikdan nga nagpagawas ang gobyerno og 50-milyong piso nga pabuya alang sa impormasyon nga makatultol sa nahimutangan ni Dela Rosa, samtang gihatagan usab siya sa PNP og usa ka semana aron mosurender ug moatubang sa proseso sa International Criminal Court o ICC.
- Gi-atubang ni Dela Rosa ang mga kaso nga may kalabotan sa giingong crimes against humanity o mga krimen batok sa katawhan nga nalambigit sa kampanya batok sa ilegal nga droga, diin kauban usab si kanhi Pangulong Rodrigo Duterte.
- Nagtago ang senador sukad Nobyembre 2025 human mahibaloi ang pagpagawas sa ICC og warrant of arrest batok kaniya.
- Kataposan siyang nagpakita sa Senado niadtong Mayo 11 aron mobotar sa pagpili kang Senador Allan Peter Cayetano isip Senate president.
- Nagpabilin siya didto sulod sa pipila ka adlaw sa wala pa mobiya human sa insidente sa pagpamusil sulod sa Senado.
- Sa usa ka interbyu, miingon usab si Lacson nga nagtuo siyang adunay igong impormasyon ang mga awtoridad bahin sa nahimutangan ni Dela Rosa, base sa mga pahayag ni PNP Chief General Jose Melencio Nartatez Jr. ug Interior Secretary Jonvic Remulla.
- Apan gikuwestiyon ni Lacson ang panginahanglan sa 50-milyong pisong pabuya kon aduna na diay kasaligan nga impormasyon ang mga awtoridad bahin sa lokasyon sa senador.
- Gipasabot ni Lacson nga kasagarang gigamit ang mga pabuya aron madasig ang publiko sa paghatag og impormasyon bahin sa mga wanted nga indibidwal, ilabina kon lisod o peligroso ang pagpangita kanila.
- Gikuwestiyon usab niya ang paghulagway kang Dela Rosa isip “armed and dangerous,” tungod kay sumala kaniya, gitugyan na kuno sa senador ang tanan niyang lisensiyadong armas.
- Apan miangkon usab si Lacson nga wala siya masayod kon aduna pa bay laing armas si Dela Rosa.
- Bisan pa sa iyang mga pangutana, miingon si Lacson nga iyang itugyan na sa PNP ang operasyon tungod kay mas lapad ang access niini sa intelligence information o mga impormasyon nga may kalabotan sa seguridad ug imbestigasyon.
