Gikuwestiyon ni veteran journalist Philip Lustre Jr. ang mga sirkumstansya sa iyang pagdakop sa Quezon City niadtong Sabado, Oktubre 24, nga iyang giingong posibleng gituyo aron mapabilin siya sa kustodiya sa kapulisan sulod sa weekend.
Gidakop si Lustre human sa iyang pagtambong sa usa ka forum pinaagi sa arrest warrant nga giisyu sa Davao City Regional Trial Court Branch 10 kalabot sa kasong cyberlibel. Gipagawas siya human makapiyansa og P48,000.
Sa iyang Facebook post sayong kabuntagon karon lamang adlawa, giangkon ni Lustre nga wala siya mahibalo sa reklamo batok kaniya ug wala usab siya makaagi sa preliminary investigation.
Gipasalamatan usab niya ang iyang mga abogado, kaubang peryodista ug mga tigpaluyo nga mitabang sa pagseguro sa iyang kagawasan. Gikuwestiyon ni Lustre ang proseso sa iyang pagdakop ug miingon nga daw adunay espesyal nga operasyon batok kaniya.
Sa pagkakaron, wala pay dugang detalye sa mga alegasyon sa giingong mga iregularidad sa pagpatuman sa arrest warrant.
