Gipangayo sa prosecution sa International Criminal Court (ICC) nga dawaton isip ebidensiya ang expert report ug mga naunang testimonya sa tulo ka saksi sa kasong crimes against humanity batok kang kanhi Pangulong Rodrigo Duterte.
Sa mga dokumentong gisumite niadtong Oktubre 23, gihangyo sa prosecution ang mga maghuhukom nga ilakip sa kaso ang report sa usa ka eksperto ug ang naunang mga pahayag sa tulo ka saksi.
Gipasabot sa prosecution nga may kalabotan ang mga testimonya sa giingong pagpamatay ug sa alegasyon nga adunay polisiya sa paggamit og kapintasan aron “i-neutralize” ang mga gidudahang kriminal. Matud niini, nagkahiuyon ug nagpalig-onay sa usag usa ang mga pahayag sa tulo ka saksi.
Bisan pa niini, magpabilin ang higayon sa kampo sa depensa nga pangutan-on ug i-cross-examine ang mga saksi atol sa pagdungog sa korte.
Wala pa magpagawas og desisyon ang Trial Chamber III sa mga hangyo sa prosecution. Gikatakda ang final status conference sa Nobyembre 2, sa dili pa magsugod ang paglilitis kang Duterte sa Nobyembre 30.
Nag-atubang ang kanhing Pangulo og mga kasong may kalabotan sa giingong extrajudicial killings atol sa kampanya batok sa ilegal nga droga, sa panahon nga siya ang Presidente sa Pilipinas ug mayor sa Davao City.
