Labing-unom ka tawo ang namatay human naigo sa magnitude-7 nga linog ang Tibet Autonomous Region sa China niadtong Huwebes sa gabii, Oktubre 22.
Base sa mga report, mikabat na sa 65 ang mga naangol, samtang naguba ang labing menos 339 ka balay ug 20 ka kulungan sa mga hayop sa siyudad sa Nagqu.
Nahitabo ang linog alas 10:33 sa gabii, oras sa China, nga adunay sentro nga 191 kilometro sa amihanan-sidlakan sa Nagqu ug giladmon nga 18 kilometro.
Nagpakalat ang mga awtoridad og kapin 1,600 ka personnel aron motabang sa search and rescue operations ug pag-apod-apod sa mga batakang panginahanglan sa mga apektadong residente. Lakip sa gipadala ang mga temporaryong kapuy-an, tolda, folding bed, flashlight ug bisti nga panagang sa katugnaw.
Gireport usab sa mga awtoridad ang gatusan ka aftershock human sa kusog nga pag-uyog, samtang nagpadayon ang pagsusi sa kadaot ug pagtabang sa mga residente nga naapektuhan sa kalamidad.
Sumala sa report, kini ang pinakakusog nga linog nga miigo sa rehiyon sa miaging lima ka tuig. Padayon ang monitoring ug relief operations sa mga apektadong lugar.
