Giila sa Philippine Drug Enforcement Agency o PDEA nga posibleng si kanhing Bangsamoro parliament lawmaker Sultan Edrieza Hadji Nasser Rimbang ang mastermind sa napakyas nga pagsulod sa 521 ka kilo nga shabu nga nagkantidad og ₱3.5 bilyon gikan sa Laos padulong sa Pilipinas.
Sumala ni PDEA Director General Isagani Nerez sa congressional hearing kaniadtong Huwebes,Oktubre 22, 2026 dili lamang kuno financier si Rimbang kondili maoy nagplano sa operasyon, naghatag og mga sugyot sa iyang mga kauban ug mipondo sa pag-abang sa pribadong eroplano nga gigamit sa pagdala sa droga.
Base sa mga sworn statement sa mga tawo nga giimbestigahan, giila si Rimbang ug si Abdulkarin Macalatas, ang gitakdang modawat ug mopang-apod-apod sa shabu, isip mga importanteng nalambigit sa operasyon. Apan, ang maong mga alegasyon nagpadayon pang giimbestigahan sa mga otoridad.
Kahinumdoman nga kaniadtong Oktubre 1, 2026, narekober sa mga awtoridad sa Luang Prabang International Airport sa Laos ang 23 ka bagahe nga adunay sulod nga 521 ka kilo nga shabu gikan sa pribadong eroplano nga padulong unta sa Pilipinas. Nakigtambayayong karon ang PDEA sa ubang ahensiya aron masubay ang mga koneksiyon sa mga suspek ngadto sa giingong internasyonal nga drug syndicate.
Matud ni Director General Nerez, andam ang PDEA nga dakpon si Rimbang kung adunay ipagawas nga warrant of arrest batok kaniya. Kung mobiya siya sa nasod, mangayo usab ang ahensiya og tabang sa Interpol.
Samtang, giklaro ni National Bureau of Investigation Dangerous Drugs Division chief Ross Jonathan Galicia nga posibleng hangyoon sa gobyerno sa Pilipinas ang Laos nga ipaubos sa pagka-tingkagol hangtod sa tibuok kinabuhi ang posibleng silot nga kamatayon batok sa Pilipinong nadakpan sa maong kaso.
Ang Pilipino nga si Fahad Dibarosan nagpabilin sa detensiyon sa usa ka prisohan sa Vientiane, Laos, human siya gidakop kaniadtong unang bahin sa Oktubre. Sumala sa Department of Foreign Affairs spokesperson Angelica Escalona, naningkamot ang Philippine Embassy sa Vientiane nga makahatag kaniya og consular assistance.
Gipasabot sa mga opisyal nga magpadayon ang imbestigasyon sa nasod ug koordinasyon sa Laos aron matino ang tibuok papel sa mga nalambigit sa maong drug-smuggling operation.
