Nanawagan ang Makabayan bloc sa House of Representatives nga bawion ug rebisahon ang ilang bersiyon sa proposed 2027 National Budget tungod sa giingong nagpabilin niini ang mga mekanismo nga susama sa mga probisyon sa nangaging budget laws nga gideklarang unconstitutional sa Supreme Court.
Lakip sa ilang gikuwestiyon ang ₱50 bilyon nga AFP Modernization Fund, dagkong lump-sum funds alang sa mga lokal nga panggamhanan, ug pagbalhin sa pondo ngadto sa unprogrammed appropriations.
Kapin 6,000 usab ka bag-ong public works projects ang gidugang pinaagi sa gitawag nga institutional amendments, apan wala gilatid sa tagsa-tagsa ang maong mga proyekto.
Nagpasidaan si Kabataan Representative Renee Co nga nagpabilin ang risgo sa korapsyon sa nagkalainlaing infrastructure projects, lakip ang multipurpose buildings, farm-to-market roads ug mga classroom.
Samtang, nanawagan ang Gabriela Party-list og imbestigasyon sa National Farm-to-Market Roads Network Plan tungod sa mga alegasyon sa ghost projects ug overpricing.
Giawhag usab sa Makabayan bloc ang Office of the Ombudsman ug Commission on Audit nga imbestigahan ang mga opisyal nga posibleng adunay tulubagon sa mga probisyon nga giingong supak sa Konstitusyon.
Sa laing bahin, gisupak sa Palasyo ang interpretasyon sa Makabayan bloc nga mahimong manubag ang Presidente, ug miingon nga wala kini gilatid sa desisyon sa Korte Suprema.
Kung dili bawion sa Kamara ang maong sugyot, kinahanglan nga susihon sa Senado o sa bicameral conference committee ang mga probisyong gikuwestiyon ug tul-iron kini sa dili pa maaprobahan ang pinal nga budget.
