Nasuta sa Commission on Audit o COA nga adunay ₱242.358 milyong kantidad sa medical equipment ang wala ma-deliver o wala magamit kaniadtong 2025 tungod sa kakulang sa kahandam sa mga ospital ug health center.
Base sa audit report, ₱69.818 milyon nga kabtangan ang wala pa ma-deliver sa Western Visayas, samtang ₱172.54 milyon sa ubang pasilidad ang nagpabiling wala magamit.
Sa Soccsksargen, mikabat sa ₱26.699 milyon ang medical equipment nga wala magamit tungod sa pagkalangan sa operasyon sa mga super health center. Lakip usab sa mga naapektuhan ang mga pasilidad sa Mountain Province, Ilocos Norte ug Bohol.
Girekomendar sa COA nga siguruhon sa Department of Health nga andam nang gamiton ang mga health facility ayha mopalit og mga ekipo. Kinahanglan usab nga isumiter sulod sa 30 ka adlaw gikan sa delivery ang pamatuod nga na-install ug nasugdan nang gamiton ang mga kabtangan.
Pagpasabot sa DOH nga nagpagawas kini og duha ka administrative order aron pahugtan ang mga lagda sa pagpatuman sa Health Facilities Enhancement Program o HFEP.
Kahinumdoman nga gikuwestiyon usab sa Kamara nganong 200 lamang sa 600 ka health center nga natukod ubos sa HFEP ang nag-operate, diin ang pipila wala pa magamit tungod sa kakulang sa healthcare personnel.
Samtang, nakit-an sa 2025 nga pagtuon sa Philippine Institute for Development Studies ang dili patas nga pag-apod-apod sa pondo sa HFEP, lakip ang mga lokal nga kagamhanan nga nakadawat og pondo bisan dili sila ang labing nanginahanglan niini.
