Gidepensahan sa Malacañang ang pagtudlo kang Zofia Canlas isip bag-ong komisyoner sa Presidential Commission for the Urban Poor o PCUP, taliwala sa mga kritisismo sa publiko kabahin sa iyang marangyang estilo sa kinabuhi.
Nanumpa sa katungdanan si Canlas niadtong Lunes. Nag-viral sa social media ang mga litrato niini nga nagpakita sa pagsul-ob og mga designer brand ug pagbakasyon sa Europe ug United States, nga maoy hinungdan sa lain-laing reaksiyon sa mga netizen.
Matud ni Presidential Communications Undersecretary Claire Castro, dili na bag-o kang Canlas ang maong responsibilidad. Dugang pa niya, ang nag-unang konsiderasyon ni Presidente Ferdinand Marcos Jr. sa pagtudlo sa usa ka opisyal mao ang abilidad ug dedikasyon sa pagserbisyo sa katawhan, dili ang kahimtang niini sa kinabuhi.
Apan, gipadayag sa Akbayan Youth ang ilang pagsupak sa pagtudlo kang Canlas, nga ilang gihulagway nga dili angay nga representante sa mga kabus. Sumala sa grupo, daghang community leader nga dugay nang nanalipod sa mga residente batok sa demolisyon ang wala gihapoy igong oportunidad nga maapil sa pagdumala sa komisyon.
Si Canlas, 27 anyos, migradwar og Biology sa De La Salle University Manila niadtong 2024. Nahimo siyang nominee sa Batang Quiapo Party-list atol sa 2025 midterm elections ug nahimong chief of staff sa PCUP niadtong Hulyo sa samang tuig. Ang iyang amahan nga si Jose Marcell Canlas, sumala sa website sa Office of the President, nagserbisyo isip assistant secretary ubos sa Office of the Executive Secretary.
Gikwestiyon usab sa Akbayan Youth ang posibleng impluwensiya sa koneksiyon sa pamilya sa pag-ila sa mga opisyal sa gobyerno, ug gipasiugda nga ang mga posisyon nga may kalabotan sa sektor sa kabus angay nga hatagan og luna ang mga lider nga dugay nang nakigbisog alang sa ilang komunidad.
Base sa datos nga gikutlo sa report, mikabat sa P250 milyon ang gigahin nga budget sa PCUP alang sa kasamtangang tuig. Niini, P89.35 milyon ang alang sa sweldo sa 163 ka kawani, lakip ang P8 milyon alang sa upat ka komisyoner ug P2.5 milyon alang sa tinuig nga sweldo sa chairperson.
