Gikondena ni kanhing presidential spokesperson Atty. Salvador S. Panelo ang desisyon sa impeachment court nga motugot sa prosecution nga i-withdraw ang Articles I ug IV sa impeachment complaint batok kang Vice President Sara Duterte, lakip ang dili pagtugot sa depensa nga makapresentar og rebuttal evidence kalabot niini.
Sumala kang Panelo, nalapas kuno sa maong desisyon ang katungod ni Duterte sa due process tungod kay dili na mahatagan og higayon ang iyang kampo nga matubag ang mga ebidensiyang nauna nang gipresentar sa prosecution. Tungod niini, limitado na lamang kuno ang depensa sa pagpresentar og ebidensiya kalabot sa Article II.
Gikuwestiyon usab ni Panelo ang gidugayon ug timing sa desisyon, ug nagduda nga posibleng nadesisyonan na kini ayha ang pormal nga withdrawal sa prosecution ang duha ka artikulo. Gihisgutan usab niya ang recess nga gipatawag aron hisgotan sa mga senador-judge ang maong withdrawal, nga matud niya, mahimong nakahatag og impresyon nga wala daan nakahibalo ang presiding officer.
Dugang pa ni Panelo, nadaot na kuno ang reputasyon ni Duterte tungod sa mga alegasyon nga gipresentar, apan wala na hatagi og higayon ang iyang depensa nga motubag sulod sa impeachment court ug atubangan sa publiko.
