Gibasura sa en banc sa Supreme Court ang indirect contempt petition nga gisang-at batok kang Sen. Vicente “Tito” Sotto III kalabot sa iyang mga kritisismo sa desisyon sa korte bahin sa impeachment case ni Vice President Sara Duterte.
Sa desisyon nga gisulat ni Senior Associate Justice Marvic Leonen, gipasiugda sa hataas nga hukmanan nga kabahin sa publikong diskurso sa nasudnong mga isyu ang mga pahayag ni Sotto ug protektado kini ubos sa political speech.
Gipasakaan og petisyon sa grupo nga gipangulohan ni Atty. Manuelito Luna ang senador tungod sa giingong pagdaot sa pagsalig sa publiko sa hudikatura human niya gikuwestiyon ang desisyon sa korte ug ang pagsabot sa ponente sa mga lagda sa Kongreso.
Sumala sa Korte Suprema dili awtomatikong silotan ang mga kritisismo batok sa mga desisyon sa hukmanan, bisan pa kon kini maisip nga sakit paminawon o giingong sayop.
Nagpasidaan usab ang korte nga ang pagsilot sa senador tungod lamang sa pagpahayag sa iyang dili pag-uyon mahimong sobra nga paglimita sa kagawasan sa pagpahayag sa mga katawhan.
Subay niini, nanawagan ang Supreme Court sa pagtinahuray sa usag usa tali sa mga sangay sa gobyerno, samtang nagpabiling abli ang hudikatura sa makahuloganong mga kritisismo gikan sa publiko.
